Disipulo ni Jesus, bako kan Media

Sermon: Ika-Limang Domingo, Taon C

February 7, 2010

An ebanghelyo ngunyan manunungod sa pag-apod sa enot na mga disipulo. Sabi ni Jesus ki Pedro, Andres, Santiago asin Juan: ‘Dai kamo matakot; poon ngunyan, tawo na an saindong dadakupon.’ Dangan, binayaan an gabos asin suminunod saiya. An ebanghelyo nagsasabi sa sato: kaipuhan kong mga disipulo.

Kadaklan kan mga Pilipino Katoliko. Alagad mangalas kita kun tano ta mayo nin Katolikong boto? Pagsinabing Katolikong boto, bakong boot sabihon, boto na pinagdikta kan Santo Papa o kan Obispo. Bako syang siring kan boto kan Iglesia ni Kristo. An boot kong sabihon, idtong boto na nagpapahayag kan katukdoan kan Simbahan; boto na susog sa ebanghelyo kan satong Kagurangnan.

Totoong kadaklan kan Pilipino Katoliko. Kan kita aki pa, dinara kita sa simbahan kan satong magurang tanganing pabunyagan. Alagad, iba man an binunyagan; iba man an tinukduan kan tataramon nin Dyos. Digdi kita nasasala. Kadaklan kan mga lider ta sa banwaan mga Katoliko. Alagad, tano ta saro kita sa pinaka-kuraptong nasyon sa kinaban? Sabi kan satong Arsobispo, oligarkiya kaya an satong gubyerno. Alagad sabi kan iba, kleptokrasiya: pinapadalagan kita nin mga klepto, nin mga parahabon! Sa ngaran Katoliko; sa puso pagano.

Sisay an nagbibilog kan satong isip aroaldaw? Ano an rason sa pagpili ta nin sabon o shampoo? Tano ta Tide, bakong Ariel? Tano ta Pantene, bakong Rejoice?Sosog sa mga sikolohista, an satong mga pagpili dai man ginagamitan nin rason. Dinidiktahan sana kita kan satong mga inklinasyon. An satong pag-iisip kontrolado kan satong mga nahihiling asin nadadangog. Arog kaini kakusog an kapangyarihan kan mga advertisements asin kan media. Sa pagboto ta kan mga lider, dakula an posibilidad na pareho sana an satong pagpili sa sabon o sa shampoo, kun ano an magaya-gaya sa paghiling o sa pagdangog.

Mamundo na dakul an mga Katoliko an yaon sa kapangyarihan kan mga salang pananaw kan mga parabura sa radio. An opinyon kan mga paradangog nakokontrolan kan mga salang impormasyon, biribid na opinyon, asin binayaran na paghusga. An mga paradangog biktima kan mga jukebox na pagsinalangan nin kwarta, minabura; kun dai, toninong, mayong girong.

Inaapod kita ni Jesus na magin disipulo nya, bako kan mga jukebox. Pinapasunod kita ni Jesus sa saiyang mga linalakawan. Bako sanang maggibo kita nin marhay, kundi magin kitang marhay. An Banal na Espiritu na nag-eerok sa satong buhay iyo an magbabago sa sato tangnaning kita makaarog ki Jesus.

Tolong simpleng direksyon an tinatao sato ni Jesus: “talikdan an sadiri, pasanon an krus, asin magsunod sa sako.”

An pagtalikod sa sadiri bakong pagtalikod sa katungdan. Ata ngani, dapat kita parating responsable. Kundi, mawot ni Jesus na talikdan ta an satong makasadiring ambisyon na iyo an dahilan kan dai pag-uswag kan satong nasyon, kan satong banwaan, kan satong pamilya.

Pasanon an krus. An halaga kan krus ginurumos ta na sana sa bulawan na krus na binuburabod ta sa satong liog. Makangirit ngani na an mga kriminal sa mga sine iyo pa an nagsasaklay nin krus sa saindang liog. An sabi kan satong Kagurangnan, pasanon, dai pagburabudon.

“Magsunod sa sako,” sabi ni Jesus. Kan si Lindberg naglayog sa Atlantic, naggurit nin linya sa saiyang mapa na inapod nyang puntong dai nang baralikan. Kan nakalampas na sya duman sa punto, aram nyang ano pa man an mangyari, dai na sya mabalik. Arog kaini an pagsunod ki Jesus. Dapat malampasan ta an punto na dai na nin baralikan.

Inaapod kita kan Kagurangnan na mag-arog saiya. An disipulo hinuhubog kan saiyang maestro. Kun gusto tang magin tunay na Katoliko, maghinanyog kita sa saiyang tataramon. An pagigin Katoliko dai nangyayari sa papel kundi sa puso. Kun gusto tang magbago an kamugtakan kan satong banwaan, gamiton an boto na yaon an espiritu ni Jesus, bako an boto na diniktahan nin media asin kan saiyang maligno.

Pagkamoot

Sermon: Ika-apat na Domingo, Taon C

January 31, 2010

An mga babasahon ngunyan na Domingo mapapadapit sa pagkamoot. Ano an pagkamoot? An pagkamoot, mayong iba kundi an pagkamoot nin Dyos sa satuya. An pagkamoot na ini nagpapasarig sa sato, asin ini man an nagtatao sato nin kusog tanganing mapasarig ta man an iba sa ngaran nin parehong pagkamoot.

An salang pagkamoot siring sa kwarta, nagwawara an halaga. Mahamis, nakakakilig, pero nagbabarato an halaga. Sa ensiklikal kan satong Santo Papa Benedicto, Caritas in Veritate, pinapagirumdom kita na an pagkamoot asin katotoohan dai nasusuway. “Namomotan taka, asin ika sana… pero namumutan ko man si Pepita” – bako ining pagkamoot. “Luv u, mis u” pero sa text lang – bako ining pagkamoot. “Okay ka, ika an pinakamarhay na lider na nabisto ko” pero aram mo man na dakul an ginigibong kurapsyon – bako ining pagkamoot. An pagkamoot dai nasusuway sa katotoohan. Siring man, kun ika magsasabi kan totoo, dapat yaon man dyan an pagkamoot. “An padi samo bakla” – dawa pa iyan totoo, kun iyan pagbalubagi, bako iyan pagkamoot. “An padi samo bari-bari, pero mahigos asin nangangadyi” – totoo asin may pagkamoot.

“Maribok na bronse asin nagtatangtang na simbal.” An simbal magayon pagdangugon kun yaon sa orkestra, pero malising kun sya sana. Kaya an ano man na marhay na gibo paagi nin pag-anunsyo nin pagkamoot. An pagtao nin burak o tsokolate, an paglinig sa plasa pagkatapos nin pyesta, an pagsermon nin magayon dapit sa pagkamoot – mga pahayag nin pagkamoot. Alagad, kun sa kalag, mayo nin tunay na pagkamoot, ining mga marhay na gibo garo maribok na bronse asin nagtatangtang na simbal.

Ini an Michael Jackson syndrome. Si MJ sarong sikat na parakanta. Alagad kaipuhan nyang padanayon si saiyang kasikatan. Tanganing magdanay sa kasikatan, dakul syang isinumpay sa saiyang buhay, mga gimik arog kan: nagpabagong itsura; nag-agom - duwang beses; nagka-igwa nin tolong aki; nagmukna nin Nederland, an kinaban kan saiyang pantasya. Ini gabos ginibo nya tanganing padagos na sya magin sikat sa mata nin mga tawo. Alagad, dawa sa tahaw kan mga ginigibo nya, aram nya na padikit-dikit, nawawara na an saiyang kasikatan. Ini an nagpupurisaw kan saiyang isip. Dai nya na aram kun ano pa an kaipuhan gibohon nya. Kan hinubaan sya kan saiyang kasikatan, duman nya nahiling na mayo man laman si saiyang buhay. Duman nya nadiskubre an kawaran kahulugan kan saiyang buhay. An saiyang kalag mayo nin tunay na pagkamoot.

Ini an peligro sa satong buhay. Namomoot kita bako sa satong kapwa, kundi sa satong sadiri. Namomomoot kita bako sa satong banwaan, kundi sa satong personal na buhay. Bako ini an tunay na pagkamoot. Kun ika maggradwar sa elementarya asin makakua nin medalya na “Most Industrious”; kun ika makatapos nin Kolehiyo asin makakua nin medalya na “Summa Cum Laude”; kun ika magtukdo sa kariton asin makakua ka nin medalya na “CNN Hero”; kun ika gubernador, asin makakua ka nin Award na “visionary”; maglikay ika. Pagnaghanap ka nin paagi tanganing magdanay an saimong kasikatan, pagnaglaog ka na sa showbiz, pag nagka-crush ka na ki Angel Locsin, ini an amay na sintomas kan Michael Jackson syndrome.

An mga medalya na madara saimo sa kasikatan, mga tingga man sana ini. Mga pantasya ini. Mayo man ining laog o laman. Kun tubudan mo ini, marurungaw ka. Masisibot ka sa radio na magparapaliwanag kan saimong kamugtakan. Masisibot kang magparapurot kan saimong marhay na imahen tanganing dai iyan mapasa. Kun iyan nangyayari na sa saimong buhay, iyan saro nang Michael Jackson syndrome. Garo ka idtong sinabi sa ikaduwang babasahon na maribok na bronse o nagtatangtang na simbal. An saimong buhay mayong laman kundi pasali sana .

Gabos kita namomotan nin Dyos. Pinili na kita nin Dyos bago pa kita ipinangidam. Mayo sato an nabuhay na aksidente sana . Kun tano ta yaon kita sa kinaban, ini nin huli ta binoot nin Dyos na yaon kita sa kinaban. Dai dapat kita matakot huli ta an Dyos namomoot sa sato. An mga Ampatuan dai nagtiwala sa pagkamoot nin Dyos kundi sa mga bandida asin armas. Sinda mga talsot. An mga lokal na pulitiko daing tiwala sa pagkamoot nin Dyos. Nagtitiwala sinda sa mga lokal na media huli ta sinda takot na maraot an saindang mga imahen. Sinda nagtitiwala sa tabang nin tawo huli kan saindang pagkatakot.

Bilang mga Kristyano, bilang mga parasunod ni Kristo, dai kita matakot. Asin magtiwala kita sa pagkamoot nin Dyos. Asin sa saiya sana .